(պաշտոնական տվյալներով 200 հազար որբերի երկիր Հոնդուրասից փախչելու փորձի համար դատապարտված 14-ամյա Անիսայի մասին)
Սան Պեդրո Սուլա – Հոնդուրաս
երկրի սիմվոլը` բանան
տարին` աքաղաղի (օրացույցով)
եղանակը` տեղ-տեղ անձրեւային
վերջին նորությունը օրվա`
Անիսան կախվել է բանտախցում
իսկ մյուս աղջիկները դեռ փախչում են
խառնած զգուշավոր քայլերն իրենց
անձրեւի ձայնին ահագնացող
Սան Պեդրո Սուլա – ազգային պարը
կիսամերկ որբեր բազմահազար
պտտվում են շուրջը աղբամանի
երկրի սիմվոլը` բանան
եղանակը՝ կրկին անձրեւային
առաստաղից կախված ճոճվում է
Անիսայի մանկամարդ մարմինը
ինչպես ճոճանակը ժամացույցի
մի այնպիսի ռիթմով վստահելի
որ ասես գտնվել է վերջապես
չափի միավորը անհուսության
Սան Պեդրո Սուլա – Հոնդուրաս
եղանակը՝ կրկին անձրեւային
– Անիսան չկա~– սվսվում է
քամին` աղջիկների մազերի մեջ
– Անիսան չկա – հաչում են
փողոցային շները պատերի տակ
– Անիսան չկա – լսում եմ
ծնծղաների բախվելը ուղեղիս մեջ
ու տեսնում խցի պատուհանից
երկինքը` ընդհատված փշալարով
Սան Պեդրո Սուլա – աղջիկները
սահում են ցեխի մեջ ու ընկնում
ապա
ելնում ու փախչում են
որից հետո
անձրեւը լցնում է ջրափոսը
մինչեւ վերջին կաթիլը հնարավոր
ասես հենց ա՛յդ էր նպատակը
բախվող ամպերի ի սկզբանե
լավ է որ գոնե անձրեւը
չի՛ քշում դիակները տերեւի պես
այլապես ինչպիսի՞ն կլինեին
գետի աչքերը առավոտյան
Սան Պեդրո Սուլա – Գլենդել
երթեւեկը կանգնած է մահվան նման
ձանձրացած կոպերս տեսիլքի գիժ
բարձրացնում են իշխաններին բեմի վրա
ու երգում են նրանք շների հետ
միեւնույն օպերան մարդասպանի
մի այնպիսի ռիթմով զարմանալի
որ ասես գտնվել է վերջապես
չափի միավորը լկտիության
Սան Պեդրո Սուլա – եւ սակայն
մեկն ասի ինչո՞ւ ես զարմանում
Նիցշեն չէ՞ր ասել մահվան մասին
ՀՈՐ` որ նախ մեռավ սրտերում
ապա եւ երկնքի հայելու մեջ
վառվեց Դեր Զորի անապատում
այնուհետ նաեւ Auschwitz-ում`
իսկական հնոցի մեջ մետաղական
Ռուանդայում
…………………………
Սիրիայում ու հիմա`
մի ջահել աղջկա բանտախցում
Նա` ով ունակ է հարության
կարող է մահանալ որքան ուզի
թե՞ դու կասկածում ես անգամ
Տիրոջ բնույթին վերածնվող
հ.գ. Սան Պեդրո Սուլա – Գլենդել
եղանակը՝ նույնքան անձրեւային
օրվա վերջին լուրը ռադիոյից
– Անիսան կախվել է բանտախցում
գիտեմ` բարկացրի քեզ Տե՛ր
պատժիր ինձ
կամ բարձրացրու վեր
փրկեա զիս մոռացումից ծերունական
Թրամփից
ռաբիսից
պատերազմից
արյունոտ լուրերից եւ հատկապես
խցանումներից այս երթեւեկի
որ վատթարանում են
օրստօրե